MÜRR VÈCC

‘L_ma scùltès bé, siòr Sìndèch;

gó qualche pensér sö chèlå cisulìnå förå paèss.

Ghé qualche testå caldå

che la s’è mitidå ‘n_dèl có dè ristrutturalå,

rifagå ‘l_tèt, perchè gà piöff dènter,

e ghè dré a ruinass ‘i_altàr, le stàtue è lè pitüre sö le pareti.

Cèrto, ‘l sarèss còmpito del pàrroco cürà le cése,

ma própe chèlå cisulìnå ché ghè ‘n_dèi cióss;

la mà costarèss tròp carå,

sé cuminciarèse a mitìgå adoss le mà per riparalå.

È pò jè quatèr mürr vècc e decrépìcc,

vàl miå la pénå ‘ndà a tocà sólcc e tère del beneficio parrocchiale

e dè le quèstue per spindìgå dré.

Ché pò, la pórtå vìå anche devosiù e attensiù dè la zènt

vèrs la céså parrocchiale.

Nò, nò, gó miå tèmp dè curìgå dré

a chèle stüpidàde dè ristrutturasiù dè ‘na cisulinå

che i dìss essèr del milå e quatèrsént.

Òho, la gà de pö dè sissènt àgn, l’è ròbå èciå;

làrgo à la modernità, nel sécol dèl progrèsso.

Ölarómm miå tègner ròbe ècie per fass ridèr dré.

Lü, ‘l_ma scùltès bé, siòr Sìndèch,

 ‘L_fàghèss n’ordinanså, ché la cisulinå l’è péricolante:

ga mètèm i fìi spinàcc;

e anche se la zènt la gà óna diussiù pèr èl sànt che ghè sö l’altar magiùr,

cól tèmp la ga farà ‘l càl

e la cisulinå, có la scüså ché l’è péricolante, la démolésèm.

Gó zà pénsàt a töt:

dù o tré quàder e ‘na stàtuå i recùperem

pèr mèter ‘ndè là céså nöå!

Le pìtüre ché ghè söi mür,

gò zà troàt dè piasàle dè ch’él antiquàre dè Ciàre.

Gò zà tratàtt al prése.

Gà sàltå fò l’ammodernamento dè la canonicå!

Chèle bèle colòne dè marmo gà lé regàle,

jà mèt ‘n_dè la sò caså nöå per al porticàto!

‘L_pórtàl dè marmo töt laoràt,

gàl régàle à mé niùtt, poarì, pèr la sò caså ‘n montàgnå.

Ghè dacórde anche i componenti la fabricerìå!

Fra tré méss la sbàtèm zò.

Fra ón àn la zènt la sà ricordarà gnà pö dè la cisulinå;

e pèr nóter ‘n_pensér an méno.

Terra & Civiltà.

(Ogni riferimento a persone o fatti realmente accaduti è puramente casuale).